Hérna er merkileg frétt.

Ég vek sérstaka athygli á þessari línu:

Exciting times for the Amarok project – the 2.0 release (perhaps as soon as this summer) will run natively on Linux, OS X and Windows!

Þar sem Amarok er, að mínu mati, langbesta tónlistarspilunarforrit sem til er, ætti þetta með réttu að kæta margan þann sem notar ekki Linux. Amarok hefur hingað til nefnilega eingöngu verið til fyrir Linux. Að vissu leyti er leiðinlegt að ég mun bráðum lengur ekki geta montað mig af því að vera í þeim litla forréttendahópi sem getur notað þetta eðla forrit, en auðvitað gleðst ég um leið fyrir hönd þeirra sem munu fá að njóta þessa rjóma tónlistarspilaranna. Þetta þýðir líka að þá get ég notað Amarok í vinnunni.

Ég mun minna ykkur á um leið og Amarok 2 kemur út og skipa ykkur að ná í forritið og prófa það, en núna verð ég að láta mér nægja að skipa ykkur að hafa þetta í huga.

Tiltekt

Ég gerði nokkuð sem var líklega löngu tímabært áðan – ég tók vandlega til í ‘draslherberginu’. Það er annað af tveimur svefnherbergjum í íbúðinni, en þar sem ég þarf bara eitt slíkt, þá breyttist þetta í herbergi þar sem ég tróð einfaldlega öllu því drasli sem ég nennti ekki að fara með niður í geymslu. Flöskum, dósum, pappakössum …

Sumir myndu kalla þetta leti, og margt væri til í því. Núna stendur hins vegar til að hingað komi inn nýtt (reyndar hundgamalt) sófasett, og þá verður svefnsófinn að fara annað. Anna, sem stendur fyrir þessum framkvæmdum, lagði til að hann færi í draslherbergið, og það gæti þá verið gestaherbergi. Þetta er prýðisgóð hugmynd, enda er svefnsófinn ekki mjög þægilegur að sitja í, hvað þá að liggja yfir sjónvarpi eða tölvunotkun.