[Frekar Fubar Furðuheimar Mark III]

Kæri lesandi,

Hvað er því til fyrirstöðu að besta augnablik lífs þíns sé nákvæmlega núna?

Eins og margir ættu að kannast við þá er í kínversku til svohljóðandi bölvun: Megir þú lifa á áhugaverðum tímum.

Það er fyrst núna sem maður gerir sér fulla grein fyrir því hversu skelfileg bölvun þetta er.

Tímarnir núna eru nefnilega helst til of áhugaverðir.

Síðustu viku var ég á Vestfjörðum með föður mínum og bróður. Það eru æskustöðvar pabba, og þaðan hef ég góðar minningar. Það var gott að bæta við þann sarp. Veðrið var yndislegt allan tímann, og hæfði það félagsskapnum vel.

Þá vitið þið ástæðuna fyrir því að ég var ekkert á gagnvarpinu allan þennan tíma.

Annars saknar maður þess merkilega lítið, svona þegar maður tekur kalda kalkúninn.

… er illa farinn. Aðfaranótt laugardags steig ég feilspor í mannfjöldanum. Nú á ég erfitt með gang.

Það er ekki tekið út með sældinni, þetta galeiðulíferni.

Well I stumbled in the darkness
I'm lost and alone
Though I said I'd go before us
and show the way back home
Is there a light up ahead
I can't hold on very long
Forgive me pretty baby but I always take the long way home

Money's just something you throw
off the back of a train
I got a head full of lightning
And a hat full of rain
And I know that I said
I'd never do it again
And I love you pretty baby but I always take the long way home

Fyrstu þrjá daga þessarar viku voru haldnir svonefndir Ólympíuleikar á vinnustaðnum mínum. Þeir náðu hámarki í gær, þar sem keppt var í (að mínu mati) skemmtilegustu greinunum.

Má þar til að mynda nefna tvítafl, en í því keppa tveir á móti tveimur í hvert skipti - tvær skákir samhliða. Þeir sem eru saman í liði eru alltaf með hvor sinn litinn, og menn sem annar þeirra nær að drepa má hinn setja inn í taflið hjá sér og nota. Afskaplega skemmtileg og súrt afbrigði. Þetta unnum við svartir, og var ég annar þeirra sem keppti í þessari grein.

Einnig var keppt í svonefndu Pöbbakvissi, og þar keppti ég ásamt tveimur öðrum. Sú keppni skiptist í tvær umferðir; hefðbundna Pöbbakvissaumferð þar sem lesnar voru upp spurningar, og liðin skrifuðu svörin niður á blað. Mitt lið var efst eftir þá umferð, og þá tók við bjölluspurningakeppni, þar sem hlaupa átti að bjöllu til að ná svarréttinum. Sú umferð var tvísýn, þar til upp var borin spurning um Íslandsvin nokkurn sem kom hingað frá Spáni árið 1998, og sem naut að sögn töluverðrar kvenhylli. Ég er viss um að spurningin átti að verða lengri, en einhverra hluta vegna kveikti ég strax þarna, rauk til, og giskaði á Kio Briggs - og það reyndist rétt. Það var sérstaklega viðeigandi að þetta svar hafi tryggt okkur sigurinn, þar sem ég var í svarta liðinu. Að vinna á spurningu um svartan mann var því auðvitað afskaplega ljúft.

Í rúmt ár hef ég safnað aurum inn á verðtryggðan reikning, þar sem ég taldi það vera öruggasta sparnaðinn til lengri tíma litið.

Þetta þýðir að bankinn leggur mánaðarlega inn á reikninginn verðbætur til að vega upp á móti áhrifum verðbólgu. Þessi upphæð er þá í beinu hlutfalli við verðbólguna hverju sinni.

Um síðustu mánaðamót voru þessar verðbætur 2.291 kr.

Til samanburðar má nefna að áður höfðu verðbæturnar hæst farið í 808 kr. - en þá var höfuðstóllinn töluvert lægri en hann er núna.

Ég held að þetta segi allt sem segja þarf um efnahagsástandið.

Ég er því nokkuð ánægður með að hafa alla vega safnað þessum aurum til hinna mögru ára - sem nú eru svo sannarlega upp runnin.

Ég tók bensín í dag hjá Atlantsolíu - 144 krónur lítrinn. Það hitti svo vel á að ég var orðinn tómur, einmitt þegar miklar hækkanir gengu í garð hjá nokkrum olíufélögum (upp í 150 krónur). Ef maður þekkir þetta rétt munu öll hin fyrr eða síðar fylgja í kjölfarið, og þá er nú betra að vera með fullan tank.

Ástandið er vægast sagt ekki gott. Allt sem vont er að lækki lækkar (gengi krónunnar, úrvalsvísitalan), en allt sem er vont að hækki hækkar (verðbólgan, verðlagið).

Það er merkilegt hversu lítið maður veltir svona hlutum fyrir sér þegar þeir eru í góðu lagi. Enginn veit hvað átt hefur fyrr en misst hefur, býst ég við.

Er ekki annars ráð að taka upp aðra mynt? Ég sé fá alvöru rök fyrir því að hafa þessa litlu krónu önnur en eitthvað þjóðerniskenndarraus.